Psalms 42
Amɨn kɨnda kokupni yɨpmaŋek dubagɨkon egɨsak dakon bɨsit
Kap on do “Maskil” yaŋ yoŋ. Uŋun Kora amɨn kabɨ dakon. Kap on kap yoŋ amɨn dakon kɨla amɨn do mandabi.
1Joŋ kɨlap dia mɨktɨm kɨbɨrɨ tɨmon pakbi do tep toŋ, uŋudeŋ nak Piŋkop gak gat egɨp do tagɨsi nandɨsat.2Piŋkop, amɨn da pakbi do tep toŋ uŋudeŋ, nak Piŋkop egɨp egɨpmɨ toŋ gak do nandɨsat.
Ni bɨsapmon kɨko Piŋkop gat egɨpdeŋ?
3Gɨldarɨ ae kalbiyo amɨn da yaŋ yoŋ, “Piŋkopgo dukon egɨsak?”
Yaŋ nayaŋ, do bɨsapmɨ bɨsapmɨ kunam tagegɨsat.
Gɨldarɨ ae kalbiyo kunam baŋ japmɨ do naŋegɨsat.
4Bɨsap tagɨsi kalɨpmɨ do nandaŋek butno obɨsi yokwi tosok.
Kalɨp nak amɨn morapmɨ Piŋkop da yutnon mibɨltaŋ yomɨŋek paŋkɨgɨm.
Nin kɨŋek kɨsɨk kɨsɨk do yaŋ tɨdagɨmaŋ.
Aŋek ya yaŋ yagɨmaŋ.
Uŋudon gak gawak gam do muwuk mamno kɨgɨt.
5Nido but yokwi nandɨsat? Nido butno jɨk tosok?
Nak Piŋkop do nandaŋ gadaŋek uŋun da yokwikon baŋ kukwaŋ nepjak do jomjom abeŋ.
Uŋun Piŋkopno, do aeno mani yaŋ aŋkɨsikeŋ.
6Butno madepsi jɨk tosok, do nak gak do nandɨsat.
Nak Jodan Pakbi tet do ae Ɨleŋ Emon ae Ɨleŋ Misa uŋudon egek aeno nandaŋ gamɨsat.
7Tap da tagaŋ wɨŋek ɨleŋon mɨktɨm wɨtjisak ae pakbi tek maŋakwa wɨwɨk madep asak,
uŋudeŋ gɨn jɨgɨ morapmɨ da wɨtjɨŋ namɨŋakwa yokwisi nandɨsat.
8Yawe da gɨldaron but dasi galak taŋ namɨsak.
Kalbi ya yaŋ iyɨk do kap yosot.
Piŋkop egɨp egɨp namɨsak uŋun bɨsit iyɨsat.
9Piŋkop tɨp madepno yaŋ iyɨsat, “Gak nido ɨŋtaŋ namɨsal?
Yum pɨndagaki uwal da abɨŋ nepmaŋakwa butno nido obɨsi jɨk tosok?”
10Toktogɨsi uwalno da sɨtnok aŋ namɨŋek yaŋ yoŋ, “Piŋkopgo dukon egɨsak?”
Gen uŋun da gobɨŋ da yaŋ yamaŋ namɨŋakwan kɨmot do nandɨsat.
11Nido but yokwi nandɨsat? Nido butno jɨk tosok?
Nak Piŋkop do nandaŋ gadaŋek uŋun da yokwikon baŋ kukwaŋ nepjak do jomjom abeŋ.
Uŋun Piŋkopno, do aeno mani yaŋ aŋkɨsikeŋ.
Kap 43
Copyright information for
YUT